Pälzische Poesie (Lustige Gedichte)
Pälzische Poesie
„Isch ruf Dir zu: "Moin Eri-Eri!
Kumm meglischds schnell do hi!"
Brauchschd Disch aach ned verkleide,
isch kann Disch aach so guud leide!
Jetz tu dem Schäff soi Sache richde,
er will uff'd Insel, un so G'schichde!
Kimm jetzd in die Gänge
un zieh ned alles in die Länge!
Des Sach, des muss gerichted sei,
mach hi, die Zeit gehd schnell vorbei!
Geh, alla, schick Disch,
des midd der Insel, des is wischdisch!
Soin guude Onzug brauchd er ned,
er is aach so schon sehr adrett!
Un dicke Socke pack mid noi,
dort kennt es ebbes kälder soi!
Un aach e Krawatt,
dass er was fiehrn Sunndach hadd!
Aach die Batschkapp fiehr die Birn,
sunst friehrts dem Schäff jo glei am Hirn!
Feschde Hose tu derzu,
un e dicke Jack', geh' zu!
Fiehr drunner glei die Wäsch vum Schiesser,
sunschd der Schäff, glei niesd er!
Feinripp is vielleischd ned modisch,
un aach ned erodisch,
doch gege Kält hilfts methodisch!
Hoschd Du aach nix vergesse?
Denk aach ans Middachesse!
Schmier dem Schäff soi Stulle
und mach Tee in oine Pulle!
Denn grad, wenn oiner oine Reise dud,
dud ihm der Proviant meist gud!
Dann nemm moin Schäff schön noi Doin Arm
und hald ihn feschd und hald ihn warm,
dann bloibd er xsund und fiehlt koin Harm!
Is er donn scheen xsund gebliwwe,
hob isch des ned umsunst geschriwwe!
Isch wer mir Doi Rotschläg zu Herze nemme.
Warme Klamotte un dicke Socke werd er bestimmt mitnemme.
Un eh Kapp fer soi Dach des is doch wichdisch,
sunscht erfriert soi Hern un des gonz biestisch.
In die Gänge bin isch kumme
fun de Kisch ins Wohnzimmer numme.
Die Wesch is gewesche un bereit,
denn jetzt werds wirklich longsom Zeit.
Nur noch 4x schloofe, dann sinn Ihr do!
Ei, was binn isch dann froh!
Isch hann mir schunn die Fieß gewäsche, und Hals und Ohre aach!
Isch hoff', des häld jetz bis Ihr kummd. Es sinn ja nur fienf Daach!
Wenn isch dozu die Seef g'funne hätt',
ach, was wär' isch heit adrett!
Isch dääd misch aach rasiere,
doch dann frierds misch im Gesischd,
also loss ischs bleiwwe, un rasier' misch liewwer nischd!
Isch hätt' mir aach die Zähn' geputzd,
doch hab' isch koine mehr, do hätt' es nischds genutzd!
Dodefier sinn moine Hoor ganz scheen gekämmd,
des Gebiß is ins Gesischd geklemmd,
un drunner glänzd e fresches Hemd,
dann bin isch Eisch ned gar so fremd!
Moine Schuh sinn ned ganz so blank,
doch die sinn unnerm Bauch, do sieht mans ned so, Gott sei Dank!
Ihr sehd, isch bin gerischd,
jetz kommed un verfahrd Eisch nischd!“
Eingetragen am 18.02.2016 17:10:11 von Federstilzchen
Autor: Erika Franziska Freibert und Jens Wohlkopf
Quelle: Eigenes Gedicht
Weitere Informationen unter:
|